சுகியன்

சுகியன்

தேவையானவை:

தேங்காய் துருவல் 1 கப்
உடைத்த வெல்லம் 1/2 - 3/4 கப் 
ஏலப்பொடி 1/2 ஸ்பூன்
அரிசி மாவு 3 டேபிள் ஸ்பூன் 
கோதுமை மாவு 1/2 கப் அல்லது மைதா 1/2 கப் 
உப்பு சிட்டிகை
சோடா உப்பு சிட்டிகை
எண்ணை பொறிக்க 

செய்முறை:

ஒரு பாத்திரத்தில் மாவுகளை  போட்டு ,உப்பு , சோடா உப்பு போட்டு தண்ணீர் விட்டு கரைத்து வைக்கவும். (பஜ்ஜி மாவு பதம் )
வாணலி இல் கொஞ்சம் தண்ணீர் விட்டு நறுக்கின வெல்லத்தை போட்டு கரைந்ததும் வடிகட்டவும். 
மீண்டும் வாணலி இல் வெல்ல தண்ணீரை ஊற்றி, ஏலப்பொடி தேங்காய் துருவல் போடவும்.
நல்லா கெட்டியாகும் வரை கிளறவும். 
இது தான் பூரணம் கொழுக்கட்டை க்குள் வைக்கும் பூரணமும் இதுவே தான்.  
கெட்டியானதும், இறக்கவும்.
கொஞ்சம் ஆறினதும், உருண்டைகளாக உருட்டவும்
வாணலி இல் எண்ணை வைத்து, பூரண உருண்டைகளை, கரைத்து வைத்துள்ள  மாவில் முக்கி, எண்ணை இல் போட்டு பொரிக்கவும்.
சுவையான, சுகியன் நைவேத்தியத்துக்கு  தயார் 

மனோகரம்

மனோகரம் ! 

மிகவும் அருமையான தித்திப்பு இது . எங்க அப்பாவிற்கு மிகவும் பிடித்தமானது...இதன் வித்தியாசமான சுவையால் நிறைய பேருக்கும் இது பிடிக்கும். அதன் செய்முறையை இங்கு பார்க்கலாம் 

தேவையானவை :

அரிசி மாவு 2  கப் 
பயத்தம் பருப்பு மாவு 1  கப் 
வெல்லம் 2 -  2  1 /2  கப் 
ஒரு சிட்டிகை உப்பு
பொறிக்க எண்ணெய்
இரண்டு டேபிள் ஸ்பூன் நெய் 
ஏலக்காய்  பொடி  கால் ஸ்பூன் 

இரண்டு டேபிள் ஸ்பூன் அரிசி மாவு தனியே வைத்துக் கொள்ளவும். (உருண்டை பிடிக்க ) 

செய்முறை :

மாவுகள் இரண்டையும் போட்டு உப்பு மற்றும் நெய் விட்டு, நன்கு கலக்கவும். 
சிறிது சிறிதாக தண்ணீர் விட்டு மிருதுவான மாவாக கலக்கவும். 
அடுப்பில் வாணலி இல் எண்ணெய்விட்டு காய்ந்ததும், முறுக்கு அச்சில் தேன்குழல் அச்சை எடுத்துக்கொண்டு அதில் மாவை போட்டு எண்ணெய் இல் பிழியவும்.
அடுப்பை நிதானமாக எரியவிடவும்.
கொஞ்சம் வெந்ததும் திருப்பிவிடவும்.
நன்கு பொன்னிறமானதும் எடுத்துவிடவும்.
இப்படியே எல்லா மாவையும் பிழிந்து கொள்ளவும்.
மற்றும் ஒரு அடுப்பில், வெல்லத்தை  துருவி கொஞ்சம் தண்ணீர் விட்டு வைக்கவும்.
அது கரைந்ததும், வடிகட்டவும்.
மீண்டும் அடுப்பில் வைத்து பாகு காய்ச்சவும்.
ஏலக்காய் பொடி போடவும்.
நல்ல கமர்கட் பாகு என்று சொல்லப்படும் பாகாக காய்ச்ச வேண்டும்.
அதாவது, பாகு காய்ச்சும்போது, பக்கத்தில் ஒரு கிண்ணி இல் தண்ணீர் வைத்துக் கொள்ளுங்கள். 
வெல்லம் நன்கு கெட்டிப்பட்டு ஆரம்பிக்கும்போது, அதிலிருந்து கொஞ்சம் எடுத்து இந்த தண்ணீரில் விடவேண்டும்.
அதை கையால் உருட்டிப் பார்க்கவேண்டும்.
உருட்ட வரும்போது நன்கு உருட்டி,ஒரு பாத்திரத்தில் அடித்தால், "டாண்" என்று சத்தத்துடன் உருண்டோடும்.
அதுவே கமர்கட் பாகு .
இதற்கு நடுவில் பிழிந்து வைத்துள்ள தேன்குழல்கள் கொஞ்சம் ஆறினதும் அவற்றை சிறிய துண்டுகளாக ஒடித்து வைத்துக் கொள்ளவும். 
அப்படி வந்ததும் அடுப்பை அணைத்துவிட்டு, உடைத்து வைத்துள்ள தேன்குழல் அதாவது மனோகர துண்டுகளை பாகில் போட்டு நன்கு கிளறவேண்டும்.
தட்டில் கொட்டி வைத்துள்ள அரிசி மாவை தொட்டுக்கொண்டு , சூடு ஆறும் முன் உருண்டைகள் பிடிக்கவேண்டும்.
முதலில் கொஞ்சம் அழுத்தாமல் ஜஸ்ட் உருண்டை வடிவில் பிடித்து ஒரு தட்டில் போட்டு அதை யாரையாவது ஆட்டிக்கொண்டே இருக்க சொல்லவேண்டும்.
அப்படியாக எல்லா உருண்டைகளையும் பிடித்ததும், உருண்டைகள் கொஞ்சம் ஆறி இருக்கும், அதை மீண்டும் நன்றாக அழுத்தி பிடிக்கவேண்டும்.
சுவையான மிக மிக அருமையான மனோகரங்கள் தயார்.
ஒருமுறை செய்து பாருங்கள் இது உங்களுக்கும் பிடித்தமான இனிப்பாக மாறிவிடும். 

குறிப்பு: இரண்டு அரிசி ஒரு பயத்தம் பருப்பு என்ற அளவில் அளந்து  கொண்டு, மிஷினில் கொடுத்து அரைத்து வைத்துக் கொள்ளலாம். தேவையான பொது மனோகரம் செய்து கொள்ளலாம். பொதுவாக வெறும் பயத்தம் பருப்பில் செய்த பண்டங்களை பண்டிகைகளுக்கு , நல்லதுக்கு செய்வது வழக்கம் இல்லாத காரணத்தால், இதை செய்யும்போது ஜஸ்ட் இரண்டு கடலை பருப்பு போட்டு அரைக்கவேண்டும். கடை இல் வாங்கிய மாவில் செய்வதானால் ஒரு ஸ்பூன் கடலை மாவு சேர்த்துக் கொள்ளவேண்டும் 

அவல் பொரி உருண்டை

அவல்  பொரி உருண்டை 

தேவையானவை :

2  கப் அவல்  பொரி 
ஒரு கப் துருவிய வெல்லம் 
ஒரு டீஸ்பூன் ஏலக்காய் பொடி 
கால் கப் தேங்காய்த் துண்டுகள் ( சின்ன சின்னதாக நறுக்கிக் கொள்ளவும்) 
அரிசிமாவு கொஞ்சம்


செய்முறை:

அவல்  பொரி நன்றாக சுத்தம் செய்து எடுத்துக் கொள்ளவும். 

ஒரு வாணலியில் அரை கப் தண்ணீர் விட்டு துருவிய வெல்லம் போடவும்.

அது கரைந்ததும் வடிகட்டி மீண்டும் அடுப்பில் வைத்து கொதிக்கவிடவும்.

ஏலக்காய் பொடி, தேங்காய் துண்டுகளை போடவும். 

நன்கு கொதித்து கெட்டியாகும்போது ஒரு சின்ன கிண்ணத்தில் தண்ணீர் வைத்துக் கொண்டு

அதில் கொஞ்சமாக விடவும்.

அது உருட்டும் படி வந்தால் சரியான பதம்.

உடனடியாக அடுப்பை அணைத்து விடவும்.

எடுத்து வைத்துள்ள அவல் பொரியை அதில் கொட்டி நன்கு கிளறவும்.

சூட்டுடன், அரிசி மாவை தொட்டு உருண்டைகளாக பிடிக்கவும்.

அவல் பொரி உருண்டை தயார்.

நெல் பொரி உருண்டை

நெல் பொரி உருண்டை

தேவையானவை :

2  கப் நெல் பொரி 
ஒரு கப் துருவிய வெல்லம் 
ஒரு டீஸ்பூன் ஏலக்காய் பொடி 
கால் கப் தேங்காய்த் துண்டுகள் ( சின்ன சின்னதாக நறுக்கிக் கொள்ளவும்) 
அரிசிமாவு கொஞ்சம்

செய்முறை:

நெல் பொரி நன்றாக சுத்தம் செய்து எடுத்துக் கொள்ளவும். 

'நெல் உமி 'இருந்தால் தொண்டையில் குத்தும். 

ஒரு வாணலியில் அரை கப் தண்ணீர் விட்டு துருவிய வெல்லம் போடவும்.

அது கரைந்ததும் வடிகட்டி மீண்டும் அடுப்பில் வைத்து கொதிக்கவிடவும்.

ஏலக்காய் பொடி, தேங்காய் துண்டுகளை போடவும். 

நன்கு கொதித்து கெட்டியாகும்போது ஒரு சின்ன கிண்ணத்தில் தண்ணீர் வைத்துக் கொண்டு அதில் கொஞ்சமாக விடவும்.

அது உருட்டும் படி வந்தால் சரியான பதம்.

உடனடியாக அடுப்பை அணைத்து விடவும்.

எடுத்து வைத்துள்ள நெல் பொரியை அதில் கொட்டி நன்கு கிளறவும்.

சூட்டுடன், அரிசி மாவை தொட்டு உருண்டைகளாக பிடிக்கவும்.

நெல் பொரி உருண்டை தயார்.

கார்த்திகை பட்சணங்கள்

எங்க வீட்டில் கார்த்திகைக்கு  அவல் மற்றும் நெல்  பொரி உருண்டைகள் ,  வேர்கடலை உருண்டை , பொட்டுக்கடலை உருண்டை, அப்பம், சுகியன் , வடை பாயசம் செய்வார்கள்... அதன் குறிப்புகளை இங்கே பார்க்கலாம்.